انا مدمنة ، واتفضحت يا بنااااااااااااااااااااات

كل اصحابى فى الكلية عارفين انى بعشق الكمبيوتر اكتر من نفسى ..

اروح الكلية زهقانة يقولولى ايه دا يا سارة هو النت فاصل ولا ايه ؟!!

اروح مش نايمة يقولولى انتى شكلك كده كنتى سهرانة على النت ..

اتفضحت اخر فضحنة

المصيبة بقى كانت فى محاضرة الكمبيوتر

والدكتور كان ماشى حلو وتمام

لحد ماقاااااااااااااااااااااال

على مدمنى الكمبيوتر (( اللى هما زى حالاتى ))

انهم بيبقوا بعد شوية معوقين

قام المدرج كله فتح فى الضحك

وشوية شوية والاقى كل واحدة تفوق من الضحك وتدير تبصلى وتسخسخ تاااااااااااااااااااانى

وبعد المحاضرة كلهم يقولولى عارفة يا سارة اول ما الدكتر قال مش عارف ايه

افتكرتك على طول

اكنه كان بيوصفك

واخر نكتة طلعت عليا

ان جوزى لما يعوز يكلمنى هيدخلى على الماسنجر ):

شط إسكندريه

منساش أبداً يوم رحلتنا للإسكندريه

أنا وصحابى

وخصوصاً لما إتفقنا نلعب كوره على الشاطئ

وبما إنى مش بفهم فى الكوره

فقد قمت بإستبعاد نفسى أوتوماتيكياً

من المشاركه فى اللعب منعاً للإحراج

وبدال ما أكحهلها عميتها

وقال إيه قمت بدور الحكم والمعلق فى نفس الوقت

وكنت مفكره بصراحه الموضوع سهل

ولا يتعدى إن أقعد على الكرسى

وأمسك الميكرفون

أقصد حاجه تشبه الميكرفون

وأقول الكوره مع سلوى

ومنها لبسمه

وجوووووووووووون

كنت مفكره الموضوع كده وبس

لحد ما الفريقين وقعوا مع بعض

فريق شايف إنه جاب جون

والفريق المنافس المفترى شايف إنها جات فى العرضه

وطبعاً ظهر دورى كحكم

وبجد حسيت عندها بنفسى وبدورى المهم اللى إخترته فى اللعبه

بدون قصد

أجى بقى لحل المشكله

الكوره جات جون

ولا فى العرضه

عرضه!!!

هى فين صحيح العرضه دى

اللى بيقولوا الكوره جات فيها

أصلاً الجون محددينه بكومين رمل مش أكتر

يعنى وجود العرضه شئ وهمى

وطبعاً لإننا مش ملتزمين بوقت

فالموضوع طول

وقلتلهم سيبونى أفكر

وفتره التفكير عندى كانت بصراحه

مليانه بالإغراءات

فريق يبعتلى مندوب ويقولى هنسقيكى حاجه ساقعه على حسابنا

وفريق يقولى طلباتك أوامر

وطبعاً لأنى صاحبه مبادئ

لايمكن أغيره مبادئ

وفى وسط خناقه الفريقين ودوشتهم

قررت إن الكوره جات فى العرضه

وكملت التعليق على الماتش

وأنا بمزمز ميراندا

وأكيد إنتوا فهمتوا جات منين

وعقبال المصيف الجاى

افتتاح احتمال ما يكونش افتتاح

ممكن يكون دا اول بوست فى المدونة دى وممكن يكون تانى واحد

انا ودودو بنكتب فى لحظة واحدة ، ودى كمان تعتبر من اوقاتنا الحلوة ..

دلوقتى كل واحدة فينا بتكتب تصورها عن اوقتنا الحلوة .. اللى عشناها واللى هندونها

وبحاول اخترق عقل دودو ومتخيلة انها هتسجل انطباعها عن كل واحدة من البنوتات العسولات اللى هيدونوا فى المدونة دى

ممكن اكون فشلت فى اختراق عقل دودو لأنها دايما بتفاجئنى بحاجات مبتكرة وعبقرية

بس انا عن نفسى هكتب انطباعى عن البنوتات السكرات اللى فى المدونة دى

هرتبهم حسب السن واتكلم عن كبيرتنا العسوووووولة

منمن ( موجودة انا ) : بصراحة البنوتة دى ما شوفتهاش ابداً ولا حتى سمعت صوتها لكن حبيتها جدا

عجبتنى دماغها جدا ، وعقلها وافكارها الجميلة .. كمان خفة دمها ..

وبصراحة بحس فيها شبه كبير اوى باختى .. نفس الاسم والكلية لدرجة انى ساعات بشك فيها

ههههههههههههههه

لولا ان دودو شافتها وعارفاها كنت قولت اختى وبتشتغلنى

هههههههههههههههه

تانى بنوتة عسولة هى سارورة ( بنوتة لاسعة ) والحقيقة ماعرفهاش كويس بس يشرفنى اعرفها

هههههههههههههههههههههههه

تالت واحدة هى العسولة دودو ( كلمتى ) : دى بصراحة النيك نيم بتاعها عندى ( بسكوتة ) ..

بنوتة زى البسكوت من الناس اللى تحس انها ممكن تنكسر فى ايدك ..

اخلاق جدا وذوق جدا وزى السكر ..

الحقيقة انى معرفتى الحقيقية بيها كانت لما اتبادلنا الايميلات رغم انى اعرفها من سنة فى الكلية ..

بس طبعا ماكناش بنلاقى فرصة نعرف بعض فيها كويس ..

كمان دماغها بتعجبنى جدا .. دماغ واحدة شايلة هم المجتمع دا بجد ..

وان شاء الله هتبقى صحفية جامدة جدا لأن افكارها متميزة ..

رابع بنوتة عثولة ( دودو بردو ) بس صاحبة مدونة ( حياة شكل تانى ) وهى بجد بنوتة شكل تانى ،

بعتبرها صديقة عمرى رغم ان صداقتنا عمرها سنتين ..

رفيقة الكفاح فى الكلية وايام البحث المضنى عن جرنال يقبل نتدرب فيه ..

ياااااااااااااما اتمشينا فى شوارع طنطا لحد ما الناس حفظتنا .. بجد البنوتة دى زى الملايكة ..

بردو اخلاق وذوق ورقة ودماغ جامدة اوى ... دايما بحسها بتقرا افكارى ، ودايما بتشجعنى انفذ افكارى المجنونة ..

بث خلاص .. هما دول البنانيت اللى عشت معاهم اجمل لحظات حياتى فى السنين اللى فاتت دى ..

وبجد بجد بدعى ربنا الف مليون مرة يديم حبنا فى الله ..