الأحد، 13 أبريل 2008

فاتن وريكس


فاتن مهوسه بتربيه القطط والكلاب

فى يوم من الأيام

مر كلب جربان من قدام بيت فاتن

جابه حظه العسر لحد عندها

بصيت ناحيته

وقالت فى نفسها

هو دا اللى بدور عليه

وطبعاً بما إن فاتن بت نظيفه

فكان من الطبيعى إنها تحمى الكلب الجربان

وخدته على الحمام عدل

وقعدت تغسل فيه من فوق لتحت

بالميه والصابون

والشامبو كمان بتاع أختها نسمه

الكلب ياعينى كان بيفرفر تحت إيديها

وهى برضه مستمره فى عمليه الغسيل

كأنها بتغسل عربيه

وبكدا إنتهت المهمه الأولى

باقى إنها تسميه إسم

علشان يبقى كلب إبن ذوات

قالت هسميه ريكس

وعاش السيد ريكس فى البيت

أكل شارب نايم

واخد حقه تالت ومتلت

زيه زى أى فرد البيت

وطبعاً لأن فاتن ربنا مديها الصحه

والكل بيخاف منها

فريكس كان له الأولويه فى كل حاجه

وإعتبرته فاتن أهم من نسمه وإبراهيم

اللى هما إخواتها

وكان يشاطر فاتن الهوس والجنان

أخوها القذافى

ومــــــــــــــــــــــــــــــــــــــازال

لدرجه إنهم ممكن يسيبوا أكلهم لريكس

لو حسوا إنه لسه مشبعش

وغير كده كانوا بيهتموا بنفسيه ريكس

وعلشان كده كان لازم ريكس يتفسح كل يوم فى البلد



وفى ليله من ذات الليالى الصيفيه

الجميله والمنعشه

حصل الأتى:


أوصف لكم بس المشهد

عربيه إيهاب داخله الشارع

صوت فرامل جاااااااااامده

فاتن بتصرخ صراخات متواليه

فى ثوانى الناس إتجمعت

وإتلمت على صوت صراخ فاتن

ناس فاكرها حادثه

راحت ضحيتها فاتن أو حد من الشارع

والحريم بأه جايه تصرخ من بعيد

على إعتبار ما سيكون

وأنا بأه ملحقتش أطلع بره

بصيت من الشباك

اللى بيطل على موقع الأحداث

شفت إيه؟؟؟؟؟؟؟؟؟؟؟؟؟

شفت فاتن مرميه على الأرض

بتهز فى ريكس

وبتقوله رد عليا وبتصرخ

والقذافى دموعه على خده ياعين أمه

ومش قادر قادر يتكلم

أما بأه عن رأى الناس

فى اللى حصل دا

ففيه ناس

لعنت فاتن وتربيه فاتن

وباقى الناس والأغلبيه العظمى

كانت واقفه تتفرج

ومش ماسكه نفسها من الضحك

وأنا طبعاً كنت منهم

ناس تقولها

البركه فيكى وفى أخواتك ربنا يخليهم يافاتن

وناس تقولها العمر الطويل ليكى

وناس قالت لها هنجيب لكى كلب غيره بكره

بس بطلى عياط

وفاتن على صرخه واحده

ييييييييييكس ماااااااااااااااااات

أصلها كانت لدغه فى حرف الراء

والناس تقولها كل ده علشان كلب

يابنتى إرحمى نفسك

ترشقهم فاتن بنظره من اللى تخوف

بس متقولوش كلب

ياحبيبى ياريكس

والله ياجماعه كأننا كنا فى مسلسل عربى

مات فيه البطل

والبطله كانت فاتن

وعلى فجأه بصيت ناحيه إيهاب السواق

وقالتله إنت السبب

إنت السبب

والله لوريك

أنا بأه هقتلك إبنك

كان ناقص شويه

وتقوله إنت اللى قتلت بابايا أه يابابايا

إيهاب السواق

ركب عربيته وكمل طريقه وكأن شيئاً لم يحدث

بصراحه أنا حسيت إن موت ريكس كان فيه غموض

أصل ريكس من النوع اللى بيخاف على نفسه

يبقى إزاى يقف قدام عربيه

وفى الأخر

تقريباً عرفت السبب

يبدو إن ريكس إتلكك علشان يخلص من فاتن

قال الموت أريح لى

أصل ريكس كان برغم العز والهنا

اللى كان عايش فيه

إلا إنه كان بيعانى من فاتن

لأنها كانت لازم تحميه كل يوم

لحد ما الكلب باش

ويمكن يكون دا

السبب الرئيسى لإنتحار ريكس



المهم المولد إنفض

وبقيت فاتن والقذافى وجثه ريكس

فاتن:تفتكر ياقذوفا هنعمل إيه بالجثه؟

القذافى: مش عارف

ألقذافى : تيجى نحفر حفره كبيره وندفنه فيها

فاتن : ويهون عليك ياقذافى

القذافى : أمال هنعمل إيه ياتونه؟

فاتن : أنا عرفت

بما إن ريكس كلب نظيف وبيحب النظافه

والميه بالتحديد

فأنا قررت إننا نرميه فى الترعه

وقد كان



وداعـــــــــــــــــــــــــــــــــــــــاً ياريكس

لا إرتحت منها حى ولا ميت

هناك 20 تعليقًا:

FaceMoon يقول...

هههههههه وداعاً ياريكس
حتوحشنا الله يرحمة
انا مش عارفة دى حدوتة خيالية ولا فى الحقيقة فعلا بس انا اعرف ناس كدة بجد هو مش عيب حد يهتم بحيوانات معينة يمكن عشان بيحسوا بالوحدة لكن الغلط انهم يفضلوهم عن اى حاجة فى حياتهم متهيألى دة مرض ربنا يشفى بقى
تحياتى

استراحة محمد يقول...

هههههههههههههههههه
الله يرحمك يا ريكس فى الجنة ونعيمها
هو يعنى هيبقى عذاب دنيا واخرة
وانا من هنا بوجه رسالة لفاتن ، انتظرى شبح ريكس يطلعلك فى اى لحظة
************
على الهامش :
مش عارف ليه بعد ما قريت الموضوع ده افتكرت الكليب بتاع الكلب اللى كان شايل عضمة ورايح لمراته لقاها بتخونه فقرر انه ينتحر
يمكن عشان الموضع بتاعك فيه كلب
موضوعك خلانى اضحك من قلبى .. شكرا بجد

mnoon يقول...

facemoon
على فكره يابنتى دى حصلت والله
مش حدوته
بس أيامها كانت فاتن فى أعدادى
وكلامك صح فعلا
بخصوص موضوع الوحده
لان بجد كانت فاتن أيامها بتحس بالوحده
لكن دلوقت خلاص
سلاااااااااام

mnoon يقول...

إستراحه محمد
خلاص يامحمد أوعدك إنى هوصلها
رسالتك إن شاء الله

وبجد تعليقك إنت اللى بسطنى
وخليك متابع معانا
فى المدونه دى

لأنك ياما هتشوف جنااااااان
بس متستغربش
لما تلاقى العقل كله فى المدونات التانيه
بتاعتنا برضه

تحياتى

كلمتى يقول...

ازيك يامنايا
هههههههههههههههههههههههههههههه
أصل فاتن ماتبقاش فاتن لو ماعملتش كده
ربنا يشفينا كلنا
اصلنا شله بجد مجنونه
وشكلنا هنتفضح فى المدونه دى
ربنا يستر

Unknown يقول...

هههههههههههه
ايه الاهتمام ده !
ده لو كان عريس متقدم لها مكنش قابل المعاملة دي في بيتهم
وبعدين ملكيش دعوة باللدغه ومتتريقيش عليها لو سمحتي
أصل عندي انا كمان لدغه
وبعدين ايه الترعه اللى هي رمته فيها دي
هي مش عارفة ان فيه بلهارسيا
الكلب كده هيجي له بلهارسيا
يبقى فاتن فى حياته وبلهارسيا فى مماته
والله الحيوانات دي بتصعب عليا قوي
بنبهدلها معانا
وليها حق الفراخ يجي ليها انفلونزا الطيور عشان تنتقم مننا
بعد اما قضت سنين حياتها
من حبس ودبح وسلخ وشوي وسلق
واللى يعملها فى شوربة
واللى يحمرها
كل ده والفراخ مستحملينا
يالله ربنا يسامحنا كلنا
ميرسي ليكي ع البوست الجامد جدا ده
وان شاء الله اتابع الجديد

سارة درويش يقول...

على فكرة بجد بجد رغم ان الكلاب نجسة ورغم انه حرام تربيتها بس والله صعب عليا هو وفاتن وقذافى ، لأنى بجد مجربة الاحساس دا اوووووى ، كل ما كان قط ليا بيموت كنت بحس كانه ابنى مات .. وعلى فكرة فاتن اتعلقت بيه مش بس علشان الاحساس بالوحدة ، لأ علشان كلنا بنحتاج نحس ان فى حد محتاج رعياتنا وحبنا ومحتاج لوجودنا فى الدنيا ، وهى لقت دا فى ريكس

معلش يا منمن نكدت عليكى بس فعلا انا زعلت على ريكس وفاتن اوى

mostafa rayan يقول...

مش عارف اقولك ايه
اكيد الحادثة دي اللي طلع منها المثل الشهير جنازة حارة والميت كلب
بس هو استريح منها وتعبنااحنا
ماحنا اللي هنتعب من ريحته لما تتعفن في الترعة
صحيح فاتن تعبته وهو حي وتعبتنا وهو ميت
هي ماقلتش العزاء في اي سرادق علشان نروح نعزي

elsa7era يقول...

ازيك يامنى
البنت اة هبلة بس مش كدة قوى حرام عليكى انتى شردتيها خالص بس بجد انتى مش ناسية اى حاجة خالص ودة كل الى حصل بالظبط انتى ناوية متجوزهاش ولا اية
سلاااااااام

صاحب المضيفة يقول...

هو احنا هانلاحقها من مين ولا من مين

ربنا يهديكي يا فاتن


بس بجد قصة رايقة فعلا


تسلم الأيادي

Ahmed El-Agouz يقول...

بجد موتيني من الضحك وخليتي كل اللي حولي يضحكه علي علشان هما مش عرفين انا بضحك ليه

الله يرحمك يا ريكس قوتيلي الغزاء فين....؟
العجوز

mnoon يقول...

كلمتى
دودو إحنا إتفضحنا واللى كان كان
المشكله لو فاتن عملت مدونه
ههههههههههه
تخيلى اللى هيحصل هتقطع علينا

mnoon يقول...

TheRiddle
والله يابنى عريسها كان بياخد على دماغه
منها والراجل كتر خيره كان مستحمل

وبالنسبه للدغه دا شئ عادى
بس إنت لو سمعتها وهى بتقول يييييييييكس

ومدام الفراخ صعبانه عليك
فهى جات من عند ربنا وسعرها زاد
ومحدش هيقرب منها

سلااااااااام

mnoon يقول...

سارورة

ولا يهمك ياساره نكدى براحتك عليا

mnoon يقول...

mostafarayan

ههههههههه
سعيده بزيارتك قوى
أشوفك فى العزاء
اللى مش هقولك على مكانه

سلااااااااام

mnoon يقول...

elsa7era

منور عالم التدوين والمدونين ياسااااااااحره القلوب

وملكيش دعوه بتونه
أحسن يكون البوست الجاى عليكى
ومش هرحمك
وخليكى تقفلى مدونتك
وأفرح فيكى

غاوي حرية يقول...

الف رحمة ونور ... والله ارتاح

بس هي مش رحمته لا حي ولا ميت


هي القصة من وحي خيالك ولا ايه النظامووووز (نظام + مووز )


يا ريت تنوريني في مدونتي

wael يقول...

انا كنت هموت من الضحك بجد دمك خفيف جدا جدا
والله يرحمك ياريكس
هههههههههههههههههه
بجد دمك خفيف بس ارجوكي شيلي موضوع تأكيد الكلمه بتاع الكمنتات ده

حسبي الله ونعم الوكيل يقول...

وداعا ريكس

mnoon يقول...

غاوى حريه

القصه حدثت بالفعل